Patron han mga Kabataan nga Misyonero ngan Katekista
PAG-AMPO HA IKINA-ADLAW
San Pedro Calungsod, usa nga batan-on nga dayohan, studyante, katekista, misyonero, tangkud nga sangkay ngan martir, ginpakita mo ha amon an imo pagin tangkud ha oras hit kakuri-an pinaagi han imo pagtut-do han tulu-uhan ha butnga han kakurian ngan an imo puraw nga paghigugma para han Ebanghelyo bisan pa ihalad an imo dugo. Sakopa iton amon mga kaluyahan (ipa-abot an imo mga pangamuyo hini nga novena), ngan magin aragi-an para ha amon ha trono han pagkalooy ngan bendisyon para namon makarawat an mga grasya nga langitnon ngan ma-aghat an amon mga kalugaringon nga ipasamwak ngan pag-ukyan namon an Ebanghelyo dinhi ha tuna. Amen.
KATAPUSAN NGA PA-AMPO
Makagarahum nga Dyos, pina-agi kan San Pedro Calungsod, martir ngan saksi han Ebanghelyo, amon kunta pagsubdon an iya kaisog ngan kinabuhi para amon maipasamwak an Imo himaya, pinaagi kan Jesucristo nga Imo Anak, buhi ug naghahadi kaupod an Espiritu Santo, uusa la Dyos, ha dayon nga mga katu-igan. Amen.
SYAHAN NGA ADLAW
(Mangadi han Pag-ampo ha Ikina-adlaw)
San Pedro Calungsod, pina-agi hit imo panabang, igin-aampo namon it mga kabataan nga nawawara hit tama nga dalan, mga nagkukuri ngan an mga nagbubuhat han mga magra-ot nga bisyo. Han disisyete anyos ka pala, nagboluntaryo ka nga magin usa nga misyonero, nagsirbe nga usa nga sakristan han mga Heswita nga misyonero ha Guam. Waray ka kahadlok pagbaya han imo kalugaringon nga nasud ngan pamilya para maipasamwak hi Jesus ngadto han iba nga mga tawo. Pukawa nga giyahi an mga kabataan hit aton nasud para makilala hi Jesus: an kahulugan ngan bendisyon hit ira kinabuhi, ngan para maipa-angbit Hiya ngadto hit iba. Amen.
(Mangadi han Katapusan nga Pag-ampo; (3) nga Amay namon; (3) nga Himaya ha Amay; (3) nga San Pedro Calungsod, Ig-ampo mo kami!)
IKADUHA NGA ADLAW
(Mangadi han Pag-ampo ha Ikina-adlaw)
San Pedro Calungsod, kinasingkasing an imo pag-ampo ngan pag-ukoy han imo mga gintututdo. Gintagusya ka han kapadian nga Heswita tungod han imo uyamut ug malipayon nga buot diri la han imo pag-aram kundi kaupod liwat han imo serbisyo nga ginhahatag ha Singbahan. Gin-ataman mo an mga panaptun han mga kapadian ngan gintutduan mo an kalalakin-an nga kabataan han pagsirbe ha Altar. Pukawa liwat it amon mga kabataan nga magmay-ada hira dedikasyon hit ira mga buruhaton. Magin burabud unta hit pagbabag-o it amon Singbahan hit mga buruhaton nga pang misyon. Amen.
(Mangadi han Katapusan nga Pag-ampo; (3) nga Amay namon; (3) nga Himaya ha Amay; (3) nga San Pedro Calungsod, Ig-ampo mo kami!)
IKATOLO NGA ADLAW
(Mangadi han Pag-ampo ha Ikina-adlaw)
San Pedro Calungsod, gingiyahan mo an mga misyonero han ira pagmisyon ha Cebu ngan Leyte ngan malipayon mo nga kinarawat an pag-aghat han mga Heswita nga mag-aram ka ha Bohol. Han imo batan-on nga pangidaron, nagin usa ka na nga misyonero han imo kalugaringon nga nasud. Hul-os an imo kalipayan nga ipa-angbit hi Jesus ha iba ngan waray ka pagruhaduha pag-upod han mga kapadian ngadto han ira misyon. Pinangangaro namon pina-agi ha imo, nga mahibaru-an namon ipasamwak hi Jesus dida hit amon pamilya, eskuylahan, opisina ngan kumonidad. Pukawa kami nga amon maintindihan an misyon nga ginlarang han Dios para ha amon. Amen.
(Mangadi han Katapusan nga Pag-ampo; (3) nga Amay namon; (3) nga Himaya ha Amay; (3) nga San Pedro Calungsod, Ig-ampo mo kami!)
IKA-UPAT NGA ADLAW
(Mangadi han Pag-ampo ha Ikina-adlaw)
San Pedro Calungsod, nag-ukoy ka hin puraw nga kinabuhi ngan malipayon nga iginpasamwak hi Jesus ha iba. Gintrato mo nga may dignidad ngan pagrespeto an mga kababayehan. Maaram ka hit mga kaluyahan nga gin-aagian hit mga kabataan yana nga mga panahon mahiunong hit sekswalidad sugad pananglitan hit agap nga pagbuburod hit mga batan-on nga mga kababayehan ngan an pornograpiya. Pinangangaro namon pinaagi hit imo bulig nga palamragan mo it mga huna-huna hit mga kabataan yana nga panahon, nga it usa nga maupay ngan malinaw nga panhuna-huna makakarawat la tungod hit pakipag-usa kan Jesus, ngan dida la hira kan Jesus makakapag-ukoy hin sagrado nga kinabuhi. Amen.
(Mangadi han Katapusan nga Pag-ampo; (3) nga Amay namon; (3) nga Himaya ha Amay; (3) nga San Pedro Calungsod, Ig-ampo mo kami!)
IKALIMA NGA ADLAW
(Mangadi han Pag-ampo ha Ikina-adlaw)
San Pedro Calungsod, waray ka kahadlok magsakripisyo kay maaram ka nga pina-agi la han Kruz mahibabaru-an it pagtapud kan Jesus. An imo pagkarawat han kamatayon in usa nga grasya nga iginhatag ha imo, bisan madali kundi mabinungahun nga panahon nga imo gin-ukoy dinhi ha kalibutan. Kalooyan mo it mga tawo yana nga nag-uukoy hit pagpalabi-labi ngan salapi. Hatagan mo hira hin inspirasyon para kalamragan hira nga iton mga butang nga kaangayan matagamtaman dinhi ha kalibutan in kinahanglan hin sakripisyo ngan pag-arisgado. Tutdu-an mo kami nga magin tuhay ngan tangkod hit amon mga responsabilidad. Amen.
(Mangadi han Katapusan nga Pag-ampo; (3) nga Amay namon; (3) nga Himaya ha Amay; (3) nga San Pedro Calungsod, Ig-ampo mo kami!)
IKA-UNOM NGA ADLAW
(Mangadi han Pag-ampo ha Ikina-adlaw)
San Pedro Calungsod, han imo kahibaro pagbasa, pinalabi mo pag-aram han mga babasahon nga may kalabutan mahitungod hit aton Tolo-ohan ngan padayon mo ini nga ginpalangbo pina-agi hin pamati ngan pagpaki-ana han Kapadian nga imo naka-upod. Tutdu-an mo kami hin pag-ukoy hin tinuod hit amon tinutu-ohan pina-agi hit pamamati hit mga tawo ha Singbahan nga may kaangayan nga hibaro mahitungod hit aton pagtuo, para magbunga ini hin personal nga pakipag-usa kan Jesus. Amen.
(Mangadi han Katapusan nga Pag-ampo; (3) nga Amay namon; (3) nga Himaya ha Amay; (3) nga San Pedro Calungsod, Ig-ampo mo kami!)
IKAPITO NGA ADLAW
(Mangadi han Pag-ampo ha Ikina-adlaw)
San Pedro Calungsod, halarum it imo paghigugma hit Yukaristiya. Inaabat mo an presensya ni Jesus dida han tinapay ngan bino, kaupod han imo ungara nga makarawat mo Hiya kada-adlaw dida han komunyon. Tutdu-i kami paghigugma ngan paghatag hin kaangayan nga importansya an Yukaristiya ngan mahimo ini nga sentro hit amon kinabuhi. Magin kaparte na unta hit amon kalugaringon nga maki-usa hit pagsalin-orog hit Santos nga Misa hit amon bug-os nga kasing-kasing ug huna-huna, para tumubo it presensya ni Jesus hit amon bug-os nga pagkatawo. Amen.
(Mangadi han Katapusan nga Pag-ampo; (3) nga Amay namon; (3) nga Himaya ha Amay; (3) nga San Pedro Calungsod, Ig-ampo mo kami!)
IKAWALO NGA ADLAW
(Mangadi han Pag-ampo ha Ikina-adlaw)
San Pedro Calungsod, pina-agi han imo paghigugma kan Maria, makalilipay an pagtubo han imo pagto-o. Karuyag mo maharani kan Jesus pina-agi ha iya. Ha iyo mo ginhahalad an ngatanan nga imo problema ngan ginkarawat mo hiya nga usa nga Iroy. Waray ka pagruha-duha nga bayaan an imo panimalay para imo tumanon an imo saad kan Padre Diego Luis de San Vitores kay murayaw ka nga gin-aataman ka ni Maria. Pinaagi kan Maria nagkamay-ada ka kusog nga atubangon an kamatayon. Tutdu-i kami nga humigugma kan Maria dida hit amon kinabuhi nga Kristyano para pirme kami mag-ampo ngan maatamanon pina-agi hit iya bulig. Amen.
(Mangadi han Katapusan nga Pag-ampo; (3) nga Amay namon; (3) nga Himaya ha Amay; (3) nga San Pedro Calungsod, Ig-ampo mo kami!)
IKASIYAM NGA ADLAW
(Mangadi han Pag-ampo ha Ikina-adlaw)
San Pedro Calungsod, pukawa it mga kabataab yana para sumunod kan Jesus, sugad han imo pagkilala ngan pagsulong han imo pagto-o han bata ka pa nga asya an nagpatagusya han misyonero ngan han imo pamilya. Madali nala madara it mga kabataan yana hit bisyo ngan droga. Buligi kami, nga malamragan it kada tagsa nga mga batan-on ngan magkamay-ada personal nga pakikipagrelasyon kan Jesus. Ngan pinaagi han sakramento han kompesal, pasuon unta hit Espiritu Santo it ira mga kasing-kasing nga mag-ukoy nga may paghigugma ngan magpadayon hira magin kausa an Makagarahum nga Dyos. Amen.
(Mangadi han Katapusan nga Pag-ampo; (3) nga Amay namon; (3) nga Himaya ha Amay; (3) nga San Pedro Calungsod, Ig-ampo mo kami!)
Source: Sambuhay Nobena, St. Paul’s bookstore
Comments